Nezdâr ad nini mas tmenaway tlalit nnes ; igh nssen mas d tarmiwin zwarnin n trubba zun d Laqdam ad tt yefkan ; d imuttiten dranin n tmetti tamerukit mad yad ffaghen irumiyen tamazirt. Azemz an agh d ggurant tiwetlin mqqurnin yiwin s yan wanaw n tudert ittuskan f ufugh d uzwag. Timizar akw illan berra n temdint zun d idraren negh izughar ur yakkan tanyaft igguten ur sul zdârent ad qqent isghawsaten n willi gisent illan. Yawi uya s ad nkkren isufughen n tawjiwin ar en ttrusen, zun d kraygat imezdi, gh wakal yâden. Akal imezdi tega temdint d isaragen nnes uqjiren n tudert. Ghin agh en nmaggaren ntteni zwar, s tarwa nnesen ilemma, d imerdukkuten izdin d tmukrisin n idels, win tpsikulujit, d win usghawsa ametti. Imukrisen ad akw kkand s tuggt nnesen asnara ur inmalan n tnebâdt ur ighin ad tasi, s tgharast ighdmen, timasayin llis bedda ttini gant tines.

Mnid n tmukrisin ad ittguduyen, d usyafa idran s uzwag d tikessâd nnad ittu yan ixef nnes, tugna d tmagit ; freken tarwa n imezdaghen ad imezwagen s mas d iqqan ad sigglen s kra n tgharast, tgit asnulfu negh tega tamaght, mas ttinin ayelli isisen gh ugunes nnesen, igi t taghamarg, negh yega tagudî negh tagerzâwt, negh ghas nnan uhu mnid udem iqqjren n tsertit tunsîbt. Inmuggur d usyafa ya d tizi lligh d ffaghent trubba gh tseggiwin yâden gh umadâl negh Merrok, iddren zun d anaw ad n waddad, gh gan The Beatles, Nas Lghiwan d tiyyâd.

Ddaw uzâzu n ufrak d izâttiwen n tudert, sdan iàezriyen ad s tmatarin mqqurnin kkusan gh umugh n umarg ttalsen negh mu ssliden ayt darsen zun d Ahwac d Rraways, asin imassen d ufan nger ifassen nnesen gen it gh tayessi negh uhu, ssentin ar ttiriren, s wawal nnesen d izmulen zdânt tgudîwin gh igunsiwen ittuten, ili nnesen yudên d waddad nnesen mnid tametti, mnid ixef d mnid timatarin yunfen igiwalen nnesen.

Gh ighladen llasnin n temdinin mezzîynin n ifus n Merrok, kran iàezriyen gh yega Iggut Abdelhadi, Chater, Boufertel, Aziz Chamekh d wiyyâd swangmen ad skren yat trabbut, ssaghen as izenzâren zun d izenzâren n tafukt ffaghen is s zik n umarg n trubba ad snulfun, sgrawlen amarg amazigh. Mad yad tunan teghwrît n umarg gh teswak n Dcheira d Inezgan, sffaghent tasffift izwaren gh useggwas n 1974.

Iseggwasen imezwura uraren zun d akw imezwura tayri, taghamarg, atigen mqqurnin n tametti ittenfruruyen mnid nnesen, flen d turarin sul nit mu ttalsen imarayen nnes ittigguten kraygat ass zun d :

Wad ittmuddun ar ittka tiqbilin wa àla rebbi
a yyi tarat yan lhêrz i tayri tmelk angh

negh "wa zzin, anna s tnnit a yellan" d "immi hênna ka f rbbigh tasa wala wul".

Maca, ur ikki uzemz yat s igh ufan agharas ten yiwin s tagwit, d tazît, d tnana izdâyen n imerdukkuten n tudert d ixef; kcmen s usarag yâden n umarg d iwaliwen yusin attân, tammara d tawda ittifsun kraygat ass gh ulawen, gh teswak ar ttighar teg asetci gh idammen, gh tguriwin d tiyyet n idinanen. Tizwuri n iseggwasen 80 agh nemaggaren taguri yad zdûn gis turarin ifkan timelsa idusen i tmagit n izenzâren:

• ur immut ulegwmâd d is ka ikcem tillas
• a tafukt lligh a yegmmer ka sul ur illan
• ar nesmullugh azerg ur nemmut ur nsul
• netghwi zun tghwi tmurghi gh igenwan ikk lhif akal.

Tama n tdusi n tguri yusin tagudî d tmmara llid yad isaggwan gh tizi yan timatarin mqqurnin n usnulfu atrar gh umarg amazigh, tlla yat tgharast n tiyyet d uzawan izêlin s trabbut ad. Maca, ur d sul msasan ayt trabbut yat tizi f kra n tghawsiwin ur nssen, yawi uya s ad tyyawskarent snat trubba : Izenzâren Abdelhadi, d Izenzâren Chamkh . Mad yad tssufgh kraygat yat gisent tisfifin, ifaw mas d Iggut ad izdâren ad yeg inezgi ad ikkusu isem n Izenzâren.

Azawan atrar : musique moderne / modern music Tarmit : expérience / experience Imnaway : correspondre / correspond Imuttiten (sing : amutti) : mutations Tametti : société, communauté / society, community Asghawsa : besoin / need

Amerdukku : violence, traumatisme / violence, traumatism Tanbâdt : pouvoir / power Tamasayt : responsabilité / responsability Tagerzâwt : regret Tasertit tunsîbt : politique officielle / official policy Inezgi : être digne / to be worthy